काठमाडौँ — मोरक्कोका गोलकिपर अब्देलहाकिम मेसबाही अप्रत्याशित नायक बनेका छन् । उनले सडन–डेथ पेनाल्टीमा निर्णायक बचाउ गर्दै मोरक्कोलाई पहिलो पटक फिफा यू–२० विश्वकपको फाइनलमा पुर्याएका हुन् ।
खेलमा मोरक्कोले दोस्रो हाफमा नै गोलकिपर परिवर्तन गरेको थियो । यानिस बेन्चाओच घाइते भएपछि इब्राहिम गोमिस मैदानमा आएका थिए । तर, पेनाल्टी सुटआउटका लागि प्रशिक्षकले फेरि रणनीतिक निर्णय गर्दै मेसबाहीलाई मैदानमा उतारे — र यही निर्णय निर्णायक सावित भयो ।
सडन–डेथको क्षणमा मेसबाहीले फ्रान्सका डजिलियन न्ग्युस्सनको प्रहार रोकेपछि मोरक्कोले ऐतिहासिक जित हात पार्यो ।
खेलको १३औं मिनेटमै दुवै टोलीले आक्रमणात्मक सुरुवात गरेका थिए । मोरक्कोका ओथमाने मम्माको सुन्दर प्रहार बार माथिबाट बाहिरिएको केही क्षणमै फ्रान्सका कप्तान मेस्साम बेनामाको प्रहार बेन्चाओचले उत्कृष्ट रूपमा बचाए ।
३०औं मिनेटमा फ्रान्सका मिडफिल्डर एन्ड्रिया ले बोर्ग्नेले इस्माइल बाउफमाथि फाउल गरेपछि मोरक्कोलाई पेनाल्टी प्राप्त भयो । यासिर जाबिरीको प्रहार पोस्टमा ठोक्किएर फ्रान्सका गोलकिपर लिसान्द्रु ओल्मेटाबाट रिबाउन्ड भई गोलमा परिणत भयो ।
मोरक्कोले त्यसपछि खेल नियन्त्रणमा राख्दै पहिलो हाफमा बलियो प्रदर्शन गर्यो । ४०औं मिनेटमा फौअद जाहुआनीले गोलसमक्षै पक्का मौका गुमाए । तर, फ्रान्सले पहिलो हाफको अन्त्यतिर दबाब सिर्जना गर्दै इलाने तौरेको प्रहारमार्फत बराबरी प्रयास गर्यो, जसलाई बेन्चाओचले उत्कृष्ट रूपमा रोके ।
दोस्रो हाफमा फ्रान्सका प्रशिक्षक बर्नार्ड डियोमेडेले गरेका खेलाडी परिवर्तनले असर देखायो । बदलिएका खेलाडी मुस्ताफा डाबोको पासमा लुकास मिचालले बराबरी गोल गर्दै टुर्नामेन्टको आफ्नो पाँचौं गोल पूरा गरे ।
अतिरिक्त समयमा दुबै टोलीले गोलको अवसर पाए पनि सफल हुन सकेनन् । ८७औं मिनेटमा मैदानमा आएका र्याबी न्जिङ्गोउला दोस्रो पहेंलो कार्ड पाएपछि खेलबाट निष्कासित भए ।
अन्ततः खेल पेनाल्टी सुटआउटमा पुगेपछि प्रशिक्षकको विश्वास जित्दै मेसबाहीले नायकत्व प्रदर्शन गरे । उनको निर्णायक बचाउसँगै मोरक्को सन् २००९ पछि पहिलो पटक यू–२० विश्वकपको फाइनलमा पुगेको पहिलो अफ्रिकी राष्ट्र बनेको छ ।
