काठमाडौँ-
फ्रान्सेली क्लब पेरिस साङ्ट-जर्मेन पिएसजी ले क्लब विश्वकप २०२५ मा आफ्नो अभियान शानदार रूपमा सुरु गरेको छ। अमेरिकी शहर पासाडेनास्थित रोज बाउल रंगशालामा शनिबार राति भएको समूह ‘बी’ अन्तर्गतको खेलमा पिएसजीले स्पेनिस क्लब एटलिटिको म्याड्रिडलाई ४–० ले पराजित गर्दै तीन महत्वपूर्ण अंक जोडेको हो।
पहिलो हाफमै अग्रता
खेलको १९औं मिनेटमा मिडफिल्डर फाबियन रुइसले पेनाल्टी बक्स बाहिरबाट गरेको प्रहार गोलमा परिणत भएको थियो। पहिलो हाफको अन्त्यमा भिटिन्हाले शानदार व्यक्तिगत प्रयासमार्फत अर्को गोल थप्दै पिएसजीलाई २–० को अग्रता दिलाए।
दोस्रो हाफमा युवा खेलाडीको चमक
दोस्रो हाफको अन्त्यतिर १९ वर्षीय सेनी मायुलुले आफ्नो क्लब विश्वकप डेब्युमै पहिलो अन्तर्राष्ट्रिय गोल गरे। खेलको इन्जुरी समयमा काङ-इन लीले पेनाल्टीमार्फत चौथो गोल गर्दै खेलमा पूर्णतः पिएसजीको नियन्त्रण कायम राखे।
