काठमाडौँ- स्पेनको शीर्ष क्लब एट्लेटिको म्याड्रिडले लिभरपुलका अनुभवी डिफेन्डर एन्डी रोबर्टसनप्रति चासो देखाएको छ। लिभरपुलले भने बोर्नमाउथका युवा लेफ्ट-ब्याक मिलोस केर्केजलाई अनुबन्ध गर्नका लागि छलफल अघि बढाइसकेको छ, जसलाई नयाँ प्रशिक्षक आर्ने स्लटले पहिलो रोजाइको रूपमा हेरेका छन्।
३१ वर्षीय रोबर्टसन पछिल्लो आठ वर्षदेखि लिभरपुलको प्रमुख खेलाडीका रूपमा रहेका छन् र उनले दुई पटक प्रिमियर लिग उपाधि जितिसकेका छन्। तर, यो ट्रान्सफर विन्डोमा उनी क्लबमा रहने या जाने भन्ने विषयमा अनिश्चितता देखिएको छ।
पछिल्लो साता रोबर्टसनले आफ्नो भविष्यबारे खासै नसोचेको बताउँदै सिजनपछिको बिदा उपभोगमा केन्द्रित रहेको बताएका थिए। यद्यपि, केर्केजको आगमनले रोबर्टसनको भूमिकामा असर पर्ने संकेत देखिएको छ।
केर्केजको ट्रान्सफर शुल्क £४५ मिलियनदेखि £५० मिलियनसम्म पर्न सक्ने अनुमान गरिएको छ। यदि सम्झौता सफल भयो भने उनी लिभरपुलको पहिलो रोजाइका लेफ्ट-ब्याक हुनेछन्।
लिभरपुलले रोबर्टसनलाई क्लबमै राख्ने चाहना राखेको भए पनि, नियमित खेल समयको खोजीमा उनी क्लब परिवर्तन गर्न सक्ने सम्भावनालाई नकारिएको छैन। अर्कोतर्फ, क्लबले हालका ब्याकअप कोस्टास सिमिकासलाई भने अन्य क्लबमा पठाउने तयारी गरिरहेको छ।
