काठमाडौँ- भारतीय महिला क्रिकेट टोलीले श्रीलङ्कामा सम्पन्न त्रिकोणात्मक एकदिवसीय शृङ्खलाको उपाधि जितेको छ। फाइनल खेलमा भारतले श्रीलङ्कालाई ९७ रनले पराजित गर्दै उपाधि उचालेको हो।
भारतको जितमा ओपनर स्मृति मन्धानाको शतक निर्णायक बन्यो।
मन्धानाको शानदार शतक
टस जितेर पहिले ब्याटिङ गरेको भारतका लागि स्मृति मन्धानाले १०१ बलमा १५ चौका र २ छक्कासहित ११६ रनको उत्कृष्ट इनिङ्स खेलिन्। यो उनको श्रीलङ्कामा पहिलो अन्तर्राष्ट्रिय शतक हो। मन्धानाको प्रदर्शनको आधारमा भारतले ५० ओभरमा ७ विकेट गुमाउँदै ३४२ रन बनाएको थियो।
बलिङमा स्नेह राणाको प्रभाव
३४३ रनको विशाल लक्ष्य पछ्याएको श्रीलङ्का ४५.२ ओभरमा २४५ रनमै समेटियो। भारतका लागि स्पिनर स्नेह राणाले ४ विकेट लिएर श्रीलङ्काको पारीलाई धराशायी पारिन्। उनले पूरै सिरिजमा १५ विकेट लिँदै ‘प्लेयर अफ द सिरीज’को उपाधि पनि जितिन्।
