काठमाडौँ — पूर्व म्यानचेस्टर सिटी डिफेन्डर जोआओ क्यान्सेलो सिजनअन्त्यसम्मका लागि साउदी क्लब अल–हिलालबाट लोनमा बार्सिलोनामा फर्किने भएका छन्।
३१ वर्षीय पोर्चुगिज फुलब्याकले सोमबार बार्सिलोनामा मेडिकल परीक्षण पूरा गरिसकेका छन् र मंगलबार औपचारिक रूपमा सार्वजनिक गरिने तयारी गरिएको छ।
क्यान्सेलोले २०२३–२४ सिजन म्यानचेस्टर सिटीबाट लोनमा बार्सिलोनाबाट खेल्दै जर्मन क्लब बायर्न म्युनिखमा बिताएको छोटो अवधिपछि क्याम्प नोउ पुगेका थिए। बार्सिलोनासँगको पहिलो कार्यकालमा उनले सबै प्रतियोगिता समेट्दा ४२ खेल खेल्दै चार गोल गरेका थिए भने पाँच गोलका लागि सहायक भूमिका निभाएका थिए।
त्यसपछि उनी पेप ग्वार्डिओलाको टोली म्यानचेस्टर सिटी छाड्दै करिब २१.२ मिलियन पाउन्डमा साउदी प्रो लिग क्लब अल–हिलालमा स्थायी रूपमा आबद्ध भएका थिए। तर त्यहाँ एक सिजन पनि पूरा नहुँदै उनले युरोप फर्कने निर्णय गरेका हुन्। यस सिजन अल–हिलालका लागि उनले लिगमा मात्र दुई खेल खेलेका छन्।
क्यान्सेलो फर्किएसँगै बार्सिलोनाले आफ्नो रक्षापंक्ति थप बलियो बनाउने अपेक्षा गरेको छ। बार्सिलोनाले बिहीबार कोपा डेल रे अन्तर्गत रेसिङ डे सान्टान्डरसँग खेल्नेछ भने आइतबार ला लिगामा रियल सोसियादादको मैदानमा उत्रिनेछ।
