काठमाडौँ – अखिल नेपाल फुटबल संघ (एएनएफए), सहिद स्मारक डिभिजन क्लबहरू तथा खेलाडी संघबीच आइतबार सातदोबाटोस्थित एएनएफए मुख्यालयमा भएको बैठक सकारात्मक रूपमा सम्पन्न भएको छ।
बिहान साढे ११ बजे सुरु भएको छलफलमा नेपाली फुटबलको हालको अव्यवस्थित अवस्थालाई समाधान गर्न सर्वपक्षीय समिति (कैयौँ पक्ष सहभागी कार्यदल) निर्माण गर्ने निर्णय भएको एक पदाधिकारीले जानकारी दिए।
बैठकले सहिद स्मारक ए, बी र सी डिभिजन लिग, साथै महिला लिग, फुटसल लिग र जिल्ला लिग सञ्चालनका लागि एकीकृत वार्षिक तालिका तयार गर्न समिति गठन गर्ने निर्णय गरेको छ। सो समितिले प्रतियोगिताहरूको ढाँचा, समयतालिका, स्थल व्यवस्थापन तथा बजेटसम्बन्धी सुझाव तयार पार्नेछ।
नेपाली फुटबलमा पछिल्ला महिनादेखि विवाद र विरोध बढेपछि एएनएफएले यस पटक सबै सरोकारवाला निकायलाई एउटै मंचमा ल्याउने प्रयास गरेको हो। यसअघि ए–डिभिजन लिग सुरू गर्न ढिलाइ भएको भन्दै खेलाडीहरूले एएनएफए मुख्यालयमै प्रदर्शन गरेका थिए।
त्यसपछि मन्त्रालय, राखेप, क्लबहरू, खेलाडी संघ र एएनएफएबीचको छलफलमा १२० दिनभित्र ए–डिभिजन लिग सञ्चालन गर्ने सहमति भएको थियो।
