काठमाडौँ। इङ्ल्यान्डले भारत र श्रीलङ्कामा फेब्रुअरी–मार्चमा आयोजना हुने आईसीसी टी–२० विश्वकपका लागि आफ्नो प्रारम्भिक टोली घोषणा गरेको छ। चोटबाट फर्किने क्रममा रहेका तीव्र गतिका बलर जोफ्रा आर्चर टोलीमा समावेश भएका छन्।
पछिल्ला दुई एसेज टेस्ट गुमाएका आर्चर साइड स्ट्रेनबाट पुनरागमनको प्रक्रियामा रहे पनि १५ सदस्यीय प्रारम्भिक टोलीमा स्थान पाएका हुन्। एसेज सिरिजमा अपेक्षाअनुसार प्रदर्शन गर्न नसकेपछि जेमी स्मिथ विश्वकप तथा त्यसअघि हुने श्रीलङ्का भ्रमणबाट बाहिरिएका छन्। जोर्डन कक्सलाई पनि टोलीमा समेटिएको छैन।
एसेजमा प्रभावशाली प्रदर्शन गरेका जोस टङले भने पहिलो पटक इङ्ल्यान्डको सीमित ओभरको टोलीमा स्थान बनाएका छन्। उनले यसअघि इङ्ल्यान्डका लागि ह्वाइट–बल अन्तर्राष्ट्रिय खेल खेलेका छैनन्।
विश्वकपअघि इङ्ल्यान्डले श्रीलङ्कासँग तीन एकदिवसीय र तीन टी–२० खेल खेल्ने कार्यक्रम रहेको छ। इङ्ल्यान्डले टी–२० विश्वकपको पहिलो खेल फेब्रुअरी ८ मा मुम्बईमा नेपालविरुद्ध खेल्दै अभियानको सुरुवात गर्नेछ।
