काठमाडौँ— एशेज सिरिजको पहिलो टेस्ट दुई दिनमै सकिएको छ, जहाँ अस्ट्रेलियाले इंग्ल्यान्डलाई आठ विकेटले पराजित गर्दै शानदार जीत हात पारेको छ। अस्ट्रेलियन ब्याट्सम्यान ट्राभिस हेडले खेलेको आतंककारी शतकीय इनिङले खेलमै मोड परिवर्तन गरिदियो।
पहिलो इनिङमा ४० रनले पछि परे पनि अस्ट्रेलियाले दोस्रो दिन अद्भुत पुनरागमन गर्यो। २०५ रनको लक्ष्य पछ्याउँदै अस्ट्रेलियाले २८.२ ओभरमै जीत हासिल गर्यो। हेडले ६९ बलमा शतक प्रहार गर्दै एशेज इतिहासकै दोस्रो द्रुत शतक बनाएका हुन्। अन्त्यमा उनले १२३ रन बनाए, जसले अस्ट्रेलियालाई १–० को अग्रता दिएको छ।
इंग्ल्यान्डको दोस्रो इनिङ दयनीय रह्यो। राम्रो सुरुआतपछि उनीहरूले ११ ओभरमध्यै ३९ रनमा ६ विकेट गुमाए। ओली पोप, ह्यारी ब्रूक र जो रुट छ बलमै पेभिलियन फर्किएपछि इंग्ल्यान्डको ब्याटिङ लाइन–अप भत्कियो। गस एटकिन्सन र ब्राइडन कार्सले अर्धशतकीय साझेदारी गरे पनि टोली ३४.४ ओभरमै १६४ रनमा समेटियो। अन्तिम नौ विकेट ९९ रनमै खसे।
अस्ट्रेलियाका बलर मिचेल स्टार्कले १० विकेट लिँदै खेलमा निर्णायक भूमिका खेले। इंग्ल्यान्डका बलरहरू भने दोस्रो इनिङमा एकदमै प्रशस्त रन खर्चिए, हेडको प्रहार रोक्न उनीहरू पूर्ण रूपमा असफल देखिए। पर्थ स्टेडियममा भएको खेलमा घरेलु दर्शकहरूले पनि अस्ट्रेलियाको उत्कृष्ट प्रदर्शनमा रमाएका थिए।
