काठमाडौँ — आईसीसी टी–२० विश्वकपको सुपर आठ चरणअन्तर्गत न्युजिल्याण्ड र पाकिस्तानबीच हुने तय भएको उद्घाटन खेल वर्षाका कारण एक बल पनि नखेली रद्द भएको छ।
कोलम्बोस्थित प्रेमादाशा रंगशालामा दिउँसोदेखि परेको वर्षाले मैदान ढाक्नुपरेको थियो। यद्यपि मौसम केही समयका लागि खुला भएपछि निर्धारित समयमा टस सम्पन्न गरिएको थियो। टस जितेको पाकिस्तानले पहिले ब्याटिङ गर्ने निर्णय गरेको थियो।
तर खेल सुरु हुनुअघि पुनः भारी वर्षा सुरु भएपछि अम्पायरहरूले निर्धारित समयभन्दा करिब दुई घण्टापछि खेल रद्द गर्ने घोषणा गरेका हुन्। खेल नतिजाविहीन भएपछि दुवै टोलीले एक–एक अंक प्राप्त गरेका छन्।
यसअघि पनि श्रीलंकाको राजधानीमा वर्षाले खेल तालिका प्रभावित पारेको थियो। अक्टोबरमा आयोजित महिला विश्वकपका क्रममा कोलम्बोमा भएका ११ मध्ये सात खेल वर्षाका कारण प्रभावित भएका थिए।
यस प्रतियोगितामा रद्द भएको यो दोस्रो खेल हो। यसअघि आयरल्याण्ड र जिम्बाब्वेबीच पल्लेकेलेमा हुने खेल पनि वर्षाकै कारण स्थगित भएको थियो।
समूह चरणमा न्युजिल्याण्ड र पाकिस्तान दुवैले तीन–तीन खेल जित्दै दोस्रो स्थानमा रहँदै सुपर आठमा स्थान बनाएका हुन्। न्युजिल्याण्ड दक्षिण अफ्रिकासँग पराजित भएको थियो भने पाकिस्तान भारतसँग पराजित भएको थियो।
