काठमाडौँ — एशेज सिरिजको दोस्रो टेस्टका लागि अस्ट्रेलियाका नियमित कप्तान प्याट कमिन्स फिट हुने सम्भावना बढेको छ। पछिल्लो महिनादेखि ढाडको चोटले पीडित रहेका ३२ वर्षीय कमिन्स पहिलो टेस्ट खेल्न नसकेका थिए। उनी अनुपस्थित हुँदाहीँ अस्ट्रेलियाले इंग्ल्यान्डलाई दुई इनिङमा १७२ र १६४ रनमै समेट्दै दुई दिनभित्रै आठ विकेटले विजय हासिल गरेको थियो।
पर्थ टेस्टमा कमिन्सको स्थान स्कट बोल्यान्डले लिएका थिए भने कप्तानीको जिम्मेवारी स्टिभ स्मिथले सम्हालेका थिए। तर अब कमिन्सले ब्रिस्बेनमा हुने दोस्रो डे–नाइट टेस्टका लागि आफू तयार हुन सक्ने संकेत दिएका छन्। गाब्बामा हुने खेल ४ डिसेम्बरदेखि सुरु हुनेछ।
कमिन्सले फक्स स्पोर्ट्ससँग भने:
“ढाड ठीक हुँदैछ। पर्थमा केही राम्रो सेसनहरू गरेँ। एक दिन करिब १० ओभर बल फ्याँकेँ, त्यसपछि केही हल्का दिन बितायँ। अहिले प्रगति राम्रो छ र सम्भावना आधा–आधा जस्तै छ।”
उनले थपे:
“अब केही दिनमै फेरि बोलिङ अभ्यास हुन्छ, र त्यसपछि अर्को खेल अघिसम्म करिब दुई हप्ता समय पनि मिल्ला। केही हप्ता अगाडिभन्दा अहिले स्थिति निकै राम्रो छ, त्यसैले आशावादी छु।”
तर अस्ट्रेलियाका लागि अर्को चिन्ता भने शीर्षक्रमका ब्याट्सम्यान उस्मान ख्वाजा हुन्। ढाडमा चोट लागेर उनी पर्थमा कुनै पनि इनिङमा ओपनिङ गर्न सकेनन्। मैदानमा स्लिपमा उफ्रने क्रममा चोट झनै बढेको कमिन्सले बताए।
कमिन्सका अनुसार:
“दुर्भाग्यवश उजी (ख्वाजा) राम्रोसँग हिडडुल गर्न सकेका छैनन्। स्लिपमा क्याच प्रयास गर्दा ढाड फेरि बिग्रियो, त्यसैले उनी ओपन गर्न सकेनन्।”
अब अस्ट्रेलियाले दोस्रो टेस्टअघि कमिन्सको फिटनेस र ख्वाजाको अवस्थाबारे अन्तिम निर्णय गर्ने छ।
